༄། །སྐྱབས་རྗེ་འཇམ་མགོན་ཀོང་སྤྲུལ་རིན་པོ་ཆེ་སྐུ་ཕྲེང་གསུམ་པའི་ཐུགས་ཀྱི་བཞེད་དགོངས་བཞིན། སྤྱི་ལོ་༢༠༠༨ ལོར་རིག་པའི་རྡོ་རྗེ་དཔེ་སྐྲུན་ཁང་འདི་ཉིད་དབུ་བརྙེས་ཡོད། དེ་ཡང་བླ་མེད་བྱང་ཆུབ་ཐོབ་པ་ནི་སྒོམ་སྒྲུབ་ལ་རག་ལས་ཤིང་། དེ་ཡང་ཐོས་བསམ་ལ་རག་ལས་པས་ན་བཤད་སྒྲུབ་ཟུང་དུ་འབྲེལ་བ་ནི་ནང་པ་སངས་རྒྱས་པའི་ལམ་དུ་འཇུག་པ་ཡོངས་ལ་གལ་གནད་ཤིན་ཏུ་ཆེ་བར་མངོན་པས། དེ་གཉིས་ཀར་རོགས་གདན་གནད་སྨིན་ཡོང་བའི་དགོས་ཆེད་ཁོ་ནར་དམིགས་ཏེ། རིག་པའི་རྡོ་རྗེ་དཔེ་སྐྲུན་ཁང་ནས་ཞལ་གདམས་ཟིན་བྲིས་སྒྲུབ་ཐབས་ཕྱོགས་སྒྲིག་དང་། བློ་གྲོས་མཐའ་ཡས་པའི་མཛོད་ཅེས་པའི་དེབ་ཕྲེང་དཔེ་སྐྲུན་གྱི་ལས་རིམ་བརྩམས་དང་རྩོམ་བཞིན་པའོ། །